النّار مشبوبه وحوله معاميل

في واحةٍ خضراء لها فلة حجاج

علومهم زينه خيار الرجاجيل

مستانسينٍ بالخلا ما به ازعاج

بالليل تلقاهم بزين التعـــــــــاليل

يمضون سهرتهم على زين منهاج

علي الرشيد - رياض الخبراء

يازين وقتٍ مضى وأسلاف

ما فيه بذخٍ .. ولا تبذير

عيشه هنيّه بدون إسراف

بالنعمة اللي لها تقدير

خبز وعريكة وجو أرياف

يالله حســـــــن التدابيـــــــر

عبدالكريم عبدالرحمن السلوم - القرائن

مدرج خضر نبته على مويه أمطار

طبيعة الخالق جنوبٍ من أبها

جوٍ طبيعي مخالطٍ عشبه أزهار

والقرص مجمورٍ بملّــة حطبها

وقدوع دلّه تنعش الراس ببهار

تعدل مزاج اللي بيمنى شربها

وإيدام مطبوخٍ على صالي النار

طازج مهوب مصبرٍ في علبها

سعود عبدالعزيز الهزاع - نعام

اخلط عسل واشرب من الكيف لاطاب

مع التمر والبر يحلى مذاقه

والسمن الأصفر خالط القرص ثم ذاب

فوق الخضار بصحبة أهل الرفاقه

ناسٍ نشاما كلهم ربع وأحباب

مامعهم اللي ينكرون الصداقه

نقالة الهرجه كثيرين الأنشاب

اخذوا على درب التعاسه بطاقه

حمد عبدالله الوايلي - حوطة سدير

منظر يسر القلب والناس تاتيه

أنا أشهد إنه يسعد اللي يشوفه

مع دلةٍ صفراء تشكر مساعيه

نقول تسلم يا مكرم ضيوفه

الطيب مايخفى على من سعى فيه

طبيعةٍ باهل الكرم ومعروفه

واللي على هالحال حنّا نهنيه

أنا أشهد إنه ما ذخر بالكلوفه

محمد عبدالعزيز الخنيفر - أشيقر

يا صباح الخير يا الوجه الفليح

يا صباح النور والشمس أشرقت

مع فطور الصبح والجو الفسيح

السماء مغيم والبروق أبرقت

وابتداء الرذاذ من الغيمه يطيح

و ام سالم لصوتها الشاقي اطلقت

هذي الكشته كأنك تبغى الصحيح

تنسى همومك اللي للنفس ارهقت

خالد ناصر المخيمر - روضة سدير

يا حلو جلستكم على فرش بتله

مع طلوع الشمس والطير غنّا

الجو كايف معكم ابريق .. دلّه

والفطور مجهزه بنتٍ تحنّــــــــا

عبدالكريم النغيمشي - لوذة

نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:

rb-khozama@alriyadh.com

ويا هلا..

صورة العدد