كان بيت الأسبوع الماضي للشاعر عبدالكريم بن خزيّم من البكيرية حول الحذر من التحويل لأي أحد عبر حسابك الشخصي لما في ذلك من تهديد لأمن الوطن ويقول:

احذر تحوّل للعماله لو ريال

امن الوطن من امننا يالفطيني

وكان صدى البيت من الشعراء:

خلك فطين وعارف كل الاحوال

والعرف ما يخفى على العارفيني

احرص على سرك وجوده بأقفال

ترى التهاون يوصلك للغبيني

وابعد عن الشبهه وحذراك الانذال

خلك نبيه وكل شغلك متيني

لا جاء الرجل صامل وللحمل شيال

ما يلحقه شك بعرض وديني

علي الرشيد/ رياض الخبراء

بعض العماله مجرمه ثم تحتال

لهامصايب في الخفى من سنيني

منهاحرامي واخرالوقت دجال

ولافيه وازع يالله انك تعيني

تمشي على طول الزمن تجمع المال

وتختال في ظل العدو المبيني

والي يطاوعهم على زود الاهمال

هذاعدو الدار فاسد مشيني

حمد عبدالله الوايلي /حوطة سدير

هذا على ماقيل من نوع الاهمال

وانا نذير اقول ياطيبيني

ناسن على الاجواد بلغش تحتال

يجرون مجرى الدم يا المسلميني

الغش وارد قلت في كل الاحوال

اخذ الحذر وانا انذر الغافليني

سعد صنهات السهلي/ الدرعية

الامير نايف ذكره الحي لا زال

عساه بالجنه مع الوارثيني

هذاوطن ما ننخدع باحلى الاقوال

ولا نساعد المجرم عدو بطيني

جنود الوطن حنا على كل الأحوال

واللي يخون خسران دنيا وديني

الفكر مضروب بلاشك وجدال

فكر اليهود الفجر الضاليني

صالح محمد البشري/الرياض

نصيحة ٍ من شاعر ٍ يكتب امثــــــــال

فيها الولا والحب لداري ودينـي

امن الوطن ياهل الوطن فخر الاجيـال

وانتم حماته بالقلم واليمينــــــي

يابن الوطن حاذور يخّدعك عمـــــــال

عمالة ٍ فيها دسايس خمِينـــــــي

من شان حب الخير اتحولها امـــــوال

وانت الضحيه والوطن له مديني

مشعل بن صنت العصيـمي/الخـرج

حافظ على حسابك ياولد الابطال

خص من المحتال لا تستهيني

لاتفتحون الباب لشينين الافعال

ترى الحذر مطلوب يالطيبيني

ياما سمعنا اموال راحت ورى اموال

سبة تهاون وانتم العارفيني

امن الوطن معروف من ذرب الافعال

وانتم رجال دايمن مخلصيني

محمد بن عبد العزيز الخنيفر/اشيقر

انا معك يا صاح في كل الاحوال

ترا الحذر واجب وفي كل حيني

هذا الوطن نحماه بالروح والمال

وحنا معه طول الدهر والسنيني

حب الفلوس ينسي العم والخال

ويعمي دني النفس عن كل زيني

ترا العماله عندنا الوان واشكال

الطيب في ناسٍ وفي ناس شيني

حمد محمد الحنو /عودة سدير

بيت الأسبوع

كتبه للصفحة الشاعر رجا بن عادي بن رمال من الرياض حول الحذر والتنبيه من خطر اشعال الفحم داخل البيوت دون التهوية الجيدة ويقول:

ترى الفحم قاتل وذباح بسكات

ياما سرق من روح يالعارفيني

نستقبل صدى هذا البيت بأربعة أبيات خلال ثلاثة

أيام من يوم النشر ويفضل الإرسال عبر الإيميل:

rb-khozama@alriyadh.com